كتب الإعلامي سمير الوافي على صفحته بالفايسبوك ما يلي :
نجيبو فنان وبعد نعايروه بقداش خلصناه ملا قلة ذوق وقلة إحترام…. على أساس غيرو يجي بعربون صغير وإلا لازمنا نسكرو الحدود على الفنانين الأجانب إذا ما يقبلوش يخلصو بالدينار !!!!
أحمد سعد أقل كاشي ياخذو هو اللي جاء بيه لتونس… في السعودية مثلا ياخذ أكثر منو بمرتين ونصف… لانو مطلوب وحفلاتو مربحة وناجحة في كل الدول العربية والسوق عرض وطلب…
وهو الأقل أجرا في تونس حاليا من بين اغلب النجوم العرب صف اول… نانسي عجرم مثلا خذات في تونس ميتين الف دولار… راغب ياخذ 100 الف… ثامر حسني 200 ألف دولار… وغيرهم !!
عیب تعایر فنان بفلوس خلصتو بيهم بناء على عقد وبالتراضي… إما نجح حفلتك جماهيريا وتنظيميا وإشهاريا واربح… وإلا إذا خسرت تحمل مسؤولية إختيارك… ومستحيل حفل أحمد سعد يطلع خاسر لأنو الفنان الأكثر شعبية ونجاح حاليا ومطلوب في كل بلاصة … إذا فشلت حفلة راو المنظم هو الفاشل والغبي…!!!
النواح على ثمانين الف دولار مجرد شعبوية… لأنو ما نجموش نسكرو مهرجاناتنا وحفلاتنا على النجوم الاجانب ونبطلو ما عادش نجيبوهم… وما نجموش نخلصوهم بالدينار… وفي نفس الوقت ماناش نخلصو فيهم أكثر من قيمة أجورهم في دول أخرى…!!!
شاهد الفيديو :
تعليقات
إرسال تعليق