عريس يهرب عن عروسه من قاعة الأفراح في ليلة الزفاف يوم 2 سبتمبر، العروس #بشرى تروي التفاصيل :
"علاقتنا كانت عن حب و مخطوبين عندنا عام و كنا نستناو في النهار هذا بالدقيقة و الدرج.. جاني هزني مالحجامة للصالة و ظاهر فرحان و شطحنا و عملنا جو..قعدنا و جا العدل بش يكتبلنا الصداق.. قلي لحظة نبرّد وجهي بشوية ماء و نجي... استنينا درج درجين ربع ساعة نص ساعة ساعة و هو ما رجعش.. حتى كرهبة العرس خلاها قدام الصالة و هرب على ساقيه من غير ما يفيق بيه حد.. عايلتي و عايلتو و الضيفان قعدنا باهتين..وينو العريس ما ثماش ريحتو... لين بداو الناس يروحو بالواحد بالواحد... و انا نص الليل خرجت آخر وحدة من الصالة .. تلفونو مسكر و فايسبوكو مسكر.. و امي دخلت للسبيطار مالصدمة ما نجمتش تتكلم... و هو لليوم ما عندي عليه حتى خبر...سمعت مبعد الي الحكاية كانت محضرة مع امو و عايلتو من قبل..اما علاش الفضيحة ليلة فرحي علاش مش من قبل؟؟ حاسة بحرقة كبيرة و حبيت جيست نفهم علاش عمل هكا اكهو... الواحد في لخر يقول الحمد لله على كل حال و مكتوب و لعل فيها خير و دفعة بلا و بالك ربي مكتبلي ما خير "
تعليقات
إرسال تعليق