الاعلامي الهادي زعيم :” كنت غالط وموش فايق اللي انا غالط”
كتب الاعلامي و مقدم برنامج فكرة سامي الفهري الهادي زعيم تدوينة على صفحته على الانستغرام قال فيها :
قبل وبعد … التصويرة هذه ديما نحب نرجعلها … التغيير اللي فيها موش تغيير جسدي خارجي بقدر ماهو تغيير داخلي ونفسي … قبل كنت نقول عادي ناكل اللي نحب كيما يجي وقت اللي يجي الحياة قصيرة وما نعيش كان مرة في العمر …
الرياضة من الباك ما درتش بيها وما كنتش نشوف روحي في قاعة رياضة وعمري فوق الاربعين … كنت غالط وموش فايق اللي انا غالط لين وقفت مرة وقلت يلا نفهم عالم الجسم وتعرفت على الدكتورة وعد @drwaadamin اللي بفضلها عرفت معنى الاكل الصحي والمغالطات الكبيرة حول السكر والروز والغلال والفواكه الجافة والخبز وزيوت القلي ووصلت لقناعة اللي لازم ناكل اللي من المفروض ينفع جسمي .
وتعرفت على مكرم @khouni.makrem الكوتش اللي عانا مزاجي الصعيب كان يقولي انا في الصالة نستنى فيك ونحشم ونقوم من الفرش ننفخ وندخل للصالة حاشم ،
خدمة كبيرة على المورال وشفت روحي نتبدل برشة كانو موش مصدقين اللي انا نتمرن برشة ضحكوا قالوا باش تفد نهارين وترجع كيما كنت غرام وبالوقت يوفى لكن انا كل ما كلامهم يزيد كل من نكبش اكثر وبديت نتبدل وليت نرقد اكثر وخير وليت نمشي طوعا لقاعة الرياضة وليت الماكلة غير الصحية نعيفها مزاجي ولا احسن نفسيتي مرتاحة خير صحتي احسن عملت تحاليل نلقى بدني في صحة جيدة وكل شي معدل .
برشة قالولي فك عليك ما عندكش وقت وجهد للشي هذا ناس اخرى قالولي فات الفوت وما عاد يفيد شي والنتيجة كانت في وقت قصير عشرين كيلو دهون بعد ما عملت اخر قياس . التصويرة هذه نرجعلها كل ما نحس اللي انا ممكن نضعف ونرجع للحالة اللي كنت عليها . نتمنى بالشي اللي قلته نوصل نغيير ولو شخص واحد من الناس اللي تتبع فيا
تعليقات
إرسال تعليق